en fy eu mk sl ga

Elvira Bonafacio

2018-11-21 16:41 — Belfast, Ireland

Ekspreshon literario artístiko 1

Un karta, un kuenta, un pintura, un kantika, un baile, ta djis algun forma ku hende ta usa pa ekspresá i kompartí pensamentu, sintimentu, nesesidat, etc. E ekspreshonnan akí no ta nada mas ku un forma mas pa kompartí i komuniká, forma ku por diferensiá di kultura pa kultura. Nort Irlanda no ta un eksepshon den esaki i e resúmen aki ta lo ta un ilustrashon di forma di ekspreshon i komunikashon ku a resaltá durante di e proyekto akí.

Biblioteka bibitu - Living Library

Esaki ta un aktividat ku a tuma lugá durante di Siman di Bon Relashon (Good Relations Week). E aktividat aki a duna posibilidat pa den un ambiente neutral, hende di tur gremio bini huntu pa kompartí i reflekshoná. Organisashon di e aktividat tabata di tal forma ku durante di 20 minüt bo por sinta na un mesa ku un buki humano. Den e kaso akí e outor di e buki mes ta esun ku ta bira e buki bibu, i basá riba bo interes e por a lesa pa bo parti di e historia, konta bo liñanan grandi di e historia, di unda su inspirashon a bini, etc. E momentu tabata asina interesante i enrikesedó ku tempu tabata muchu tiki pa kontestá tur pregunta tokante e historia i/òf e eskritor. E aktividat akí ta unu ku ta hasi lesamentu di buki a bira algu plasentero i interesante asta pa esun ku no gusta lesa. E bukinan ku a partisipá na e aktividat aki tabata kontené historia ku ta habri bista i toka kurason. Aki ta sigui algun di nan:

Un tata ku ta konta su eksperensia despues di a pèrdè su kasá i su yu na momentu ku un bòm pone intenshonalmente ta bula i mata su kasá i yu. E tata akí ta usa su eksperensia pa konsientisá un i tur ku na momentu ku tin bringamentu i atake (manera e konfrontashonnan di añanan 70 – 80) ta tur dos grupo ta pèrdè un ser kerí inosentemente. Tambe e ta usa su eksperensia pa konsientisá hende riba e importansia di pordon, pa por biba mas na pas ku otro.

Un sùr ta skohe pa sali for di un bida den monasterio i bai den un kombento kaminda e ta bai hasi trabou pastoral nan un siudat (Belfast) kaminda religion ta motibu pa sektarismo. E eskoho di su kambio tabata eksigí un sierto preparashon, ku a dun’é loke tabata nesesario pa den e estilo di bida nobo e por a aportá na sosten i guia di hopi hóben den nesesidat.

 

Kasá di un polítiko republikano ta skohe pa mustra su sosten i aporte na e identidat irlandes, siguiendo kurso di idioma. Esaki a kousa hopi konsternashon, pero e akshon revolushonario akí no a keda te aki. E señora akí, Linda Ervine, despues di esaki kuminsá duna kurso di e idioma irish den un área di Belfast ku ta karakterisá komo área di e republikano/protestanan. Su lucha tabata unu interesante, sigur mirando e atakenan personal. Pero su determinashon i su kasá ku semper a keda den su banda tin ku awor aki su instituto ta un di esnan mas grandi ku ta duna kurso di irish i ta sòru pa otro aktividat kultural.

Un migrante asiátiko ku despues di traha hopi aña komo trahadó sosial ta bai forma parti di un partido polítiko, i bira e promé polítiko imigrante (asiátiko) ku ta bai forma parti di parlamento irlandes. Klaro ku esaki tabatin su resistensia, pero Danki Dios nunka no tabatin suseso ku tabata di gran preokupashon. Tambe ta bon ku semper el a konta ku bon sosten di polis ku semper tabat’ei pa asistié na momentu ku e indiká esaki. Anna Lo, un luchadó ferviente kontra rasismo i sektarisashon tabata un di e bukinan bibu ku un historia hopi interesante.

Un hóben di 18 aña ta bandoná su pais i famia pa motibu di guera i ta pone su suerte den man di un deskonosí ku e primintié di yud’é yega na un mihó bida. E tabata algu peligroso, adaptashon na e pais nobo tampoko no a bai fásil,  pero danki Dios e resultado tabata positivo.  Aki tambe determinashon i perseveransia tabata un di e ingredientenan klave den e logro aki.

 

Mural

Un otro forma di ekspreshon ku ta masha popular na Irlanda ta (pintura) mural. Esaki no ta nada mas ku diferente pintura ku diferente artista ta pinta riba muraya ku ta keda kantu di kaminda (hopi) trafiká pa públiko. E pinturanan akí ku ta dokumentá i/òf reflehá parti di historia di Nort Irlanda, pero e ta tambe un medio pa ekspresá sintimentu i pensamentu. Segun informashon risibí di un di e personanan ku tabata forma parti di e gruponan ku tabata lucha pa igualdat di e irlandesnan, muraya tabata nan medio di komunikashon pa hopi aña. Nan no tabatin akseso na medio di komunikashon, pues un manera pa komuniká pensamentu i sintimentu tabata poniendo esaki riba muraya. Remarkabel ta ku kada área tin un lucha ku e ta reflehá, sea ta logro mará na guera òf lucha pa igualdat.

Músika irlandes

Loke a hala mi atenshon den kaso di e músika irlandes ta ku letra di nan kantikanan ta konta nan historia. Nan eksperensianan mará na lucha kombiná ku amor ta e temanan ku ta resaltá den nan kantikanan, kantá tantu na irish komo ingles. Interesante ta mira ku serka e irlandesnan na momentu ku ta papia di konsierto di músika tradishonal, ta referí akí na sinta skucha, kanta huntu ku e banda segun ta mantené e kompas ku batimentu di pia. Segun mi opservashonnan, papia durante di e presentashon no ta algu apresiá, i bailamentu ta tuma lugá ora ku e kurpanan tin basta beter den dje. Den bar (pub) irlandes tambe regularmente tin musikonan ku ta bini huntu pa deleita i entretené e públiko ku nan músika. Músika tradishonal ku ta trata e temanan ariba menshoná.