en fy eu mk sl ga

Elvira Bonafacio

2018-09-27 14:00 — Belfast, Ireland

Irlanda, unda esaki ta keda?

No ta e hendenan di Irlanda so no sa (mashá) di Kòrsou. Na Kòrsou tampoko Irlanda no ta un destinashon masha popular. Na skol nos a siña ku Irlanda ta un isla den Oropa i ta forma parti di Reino Uni, pero... nos sa muchu mas ku esaki? Ban wak!

Ora bo papia di Irlanda, poko yu di Kòrsou por bisa mas ku esaki di e pais aki, pero interesante ta ku ora nan skucha ku un hende di Kòrsou ta bai Irlanda, nan ta bai buska pa sa i nan ta ripará ku no ta tur nan kontestanan tabata kompletamente korekto. Ban wak e preguntanan atrobe.

 

Unda Irlanda ta keda?

Unda Irlanda ta keda? Irlanda ta un isla ku ta keda na parti nort wèst di Oropa, pa ta mas eksakto parti wèst di Inglatera i sùit wèst di Eskosia. Irlanda ta un isla dividí den dos parti: Repúblika di Irlanda, siudat independiente ku ta forma parti di Union Europeo, i Nort Irlanda (nòmber ofisial Northern Ireland), parti di Reino Uni huntu ku Inglatera, Eskosia i Wales. Pues ora bo papia di Irlanda, si bo no spesifiká, lo pensa ku bo ta bai Repúblika di Irlanda di kua su kapital ta Dublin, siendo bo por ta referí na Nort Irlanda di kua su kapital ta Belfast. Den e kaso aki, ami ta na Nort Irlanda, pues pa sobrá di e preguntanan lo mi trata Nort Irlanda ku tin un grandura di mas o ménos 14.140 kilometer kuadrá.

 

Kuantu habitante Irlanda tin?

Nort Irlanda tin mas o ménos 1.8 mion habitante i meskos ku otro pais na mundu nan tambe tin migrante di diferente parti di mundu. Habitantenan di Irlanda meskos ku mayoria oropeano tin koló di kueru hopi kla, aunke remarkabel si ta ku na Irlanda bo ta mira mas hende ku kabei natural koló kòrá (hòmber i muhé), kompará ku na otro parti di mundu. Pero no ta asina ku tur hende na Irlanda tin kabei kòrá, wowo blou òf bèrdè, aki tambe tin hende kabei pretu (un grupo chikí), maron i ku wowo maron,  inkluso esaki ta e grupo ku ta dominá.

Kua idioma nan ta papia na Irlanda? Na Nort Irlanda e idioma ofisial ta ingles, esaki ta tambe e idioma ku mayoria di e poblashon ta papia. Banda di ingles bo tin tambe Irish (Gaeilic) i Ulster Scots dos idioma di minoria rekonosé pa gobièrnu di e isla. E idiomanan akí ta konta tambe ku sosten di Union Oropeo pa loke ta e parti kultivo i promoshon di idioma den minoria (Other Words ta zona bo konosí?).

Pa loke ta algu típiko di Irlanda, Nort Iranda tin diferente produkto pa ofresé, entre nan, nan serbes (Guiness) i Wiskey (Bushmiles) ku nan ta usa den e Irish Coffee i  ku ta konosí serka nos na Kòrsou. Pero esaki no ta tur kos, Nort di Irlanda tin hopi mas pa ofresé.

Bo ta kla pa nos ban un Pub i dal un di e bibidanan menshoná, òf bo ke nos simplemente bai bebe un te segun ku nos ta sigui konosé otro?

 

 

Bo ke sa mas di Nort Irlanda bishitá: https://www.britannica.com/place/Northern-Ireland