en fy eu mk sl ga

Elvira Bonafacio

2018-11-17 17:21 — Belfast, Ireland

Siman di bon relashon - Good Relations week

Pa mas ku 15 aña kaba Belfast tin un Good Relations week (siman di bon relashon). Mi tin ku bisa ku a tuma mi basta tempu pa mi por a skirbi tokante e siman akí, pa motibu ku a pesar di tur kos, e ta keda un tema poko leu for di mi port’i kas. Na momentu ku mi a mira ku tin un siman di bon relashon mi a puntra mi mes, saliendo for di mi realidat di bida: di kon mester para ketu na kombibensia? Kiko a pasa ku mester para ketu na esaki? Pa mi por a kontestá e preguntanan akí mi mester a hasi muchu mas ku djis bishitá e aktividatnan organisá durante e siman akí. Tabata importante pa mi a kòmbersá  ku hende, bishitá lugá, partisipá na diferente aktividat kultural pa mi por a haña un bista ku ta bai mas leu ku wak e notorio “murayanan di pas”.

Irlanda su situashon i historia ta unu basta kompleho i esaki e hendenan di e pais mes ta bisa bo. Nan historia i eksperensia kolonial ta unu ku te dia di awe tin heridanan hopi fresku, di kua no ta tur hende ta hañando e trato adekuá pa por kura. Hamber, opreshon, inhustisia, skarsedat, desigualdat, lucha i violensia ta algun palabra klave, ku segun mi opservashonnan ta dominá nan historia i realidat di bida. E pueblo irlandes, te dia di awe ta sinti ku e mester lucha pa haña trato igual, lucha pa aseptashon di su kultura, prinsipalmente su idioma. Segmentashon ta un palabra ku te e dia di awe ta bibu den e pais akí, sigur den e generashon promé ku mi.

“Kaminda nos ta aki ta papia irish, si bo ke bo por papia kualke otro idioma ku bo ke ménos ingles.” “Tabata piedra i skupi e mucha i hóbennan akí na kaminda pa skol, djis pasobra nan ta ‘katóliko’, ta asina ku nan tin ku pasa via di un bario ‘protestant’ pa yega nan skol.” “Nò, ami no ta bai eibanda, apsolutamente ku nò,  na mi nòmber i mi aksento nan lo sa ken mi ta”. Tempu di mi tempu, mi no por a kana ku un suèter di mi tim di deporte, tempu a kambia, danki Dios.” Esakinan ta djis ehèmpel di algun ekspreshon i suseso ku no tin mas ku 20 aña bieu. Ekspreshon ku ta zona straño den orea di un yu di Kòrsou i por ta asta den orea di esun karibense, pero algu masha normal pa e oropeo. Nòmber, religion, idioma, deporte ta algun aspekto ku ta marka identidat di un persona, pero a usa esakinan pa mustra diferensia, separá i krea segmentashon. Kual ta loke netamente e siman di Bon relashon ke minimalisá.

Ku e siman di Bon Relashon ke purba pa trese e diferente gruponan étniko huntu, den un ambiente neutral pa dialogá i debatí riba tema ku ta regardá formashon di un komunidat ku bon relashon. Un komunidat ku ta sòru pa pas, i kaminda ta kompartí un futuro konhunto. E aktividat akí ku originalmente tabata karga e nòmber Community Relations & Cultural Awareness Week, a kuminsá algun aña despues ku a firma Good Friday Agreement Belfast. Un akuerdo entre gobièrnu britániko, irlandes i mayoria partido polítiko irlandes, tokante kon lo mester goberná e pais. E akuerdo akí a pone fin na e temporada di konflikto i violensia na Nort Irlanda.

Na aña 2018 Nort Irlanda por ta orguyoso ku nan logro, e siman di bon relashon ta dunando su frutanan. Si opservá kon riba e anochi kultural, sentro di siudat tabata yená ku aktividat, músika,eksposishon i un grupo grandi di e pueblo irlandes tabata reuní, pa selebrá i kompartí (sin ku tin niun klase di insidente ku ta tuma lugá). Algu ku 20 pa 25 aña pasá nan no por a ni soña kuné den e mes sentro di siudat akí. Echo ta si ku esaki ta djis e komienso. No ta sana den 20 aña, hopi siglo di lucha i violensia ku a yega na su fin na aña 1988. Pero manera hulandesnan ta bisa: waar er een wil is, is er een weg. I echo ta ku nan ta kanando e kaminda.

Good Relations week, un siman ku a laga mi reflekshoná riba mi identidat i nos desishonnan. Pasobra Nort Irlanda ta un prueba di kon por usa identidat komo instrumento pa kategorisá i dividí, en bes ku e ta un motibu pa selebrá i kompartí union. Pero nan no ta un eksepshon den mundu. Echo ta ku nos kada un tin e opshon akí (dividí òf uni) tur dia di nobo den nos man, i nos ta vosiverá esaki fuertemente na momentu ku nos skohe pa nos lider, dirigente, òf simplemente esun na kabes di nos organisashonnan.

Siman di bon relashon, i mi búskeda pa komprondé esaki, a laga mi para ketu un bes mas na e importansia di: sa historia, sa bo pasado, i biba presente konsientemente, ya ku ta e presente akí lo ta e historia di mañan. I ora Mañan puntra mi, kiko mi a pone komo fundeshi pa su historia e úniko kos ku lo mi ke kontestá ta: “Un fundeshi sano kaminda bo por sigui konstruí.”