en fy eu mk sl ga

Elvira Bonafacio

2018-10-09 18:10 — Belfast, Ireland

Sinta wak den bentana

“Sinta wak den bentana? Ta ki’ e kos laf ei? Ta nada di hasi mes no tin?” Wèl, Lauren Child un eskritor di buki masha konosí na Irlanda, ta apoyá tur mucha ku ke sinta wak pafó. No esaki so, e ta bisa e mayornan: laga e muchanan sinti nan laf, ta for di sinti nan laf kreatividat ta sali.

Lauren Child huntu ku Myra Zepf i Bruce Ingman dos eskritor i un ilustradó di buki di mucha, a kompartí ku e públiko presente na Seamus Heaney Center for Poetry, nan punto di bista tokante kon krea espasio (stimulá) kreatividat (i lesamentu) serka mucha. E entrevista/diskushon tabata bou di guia di e lokutor i presentadó di BBC Northern Ireland, Maie Louise Muir. Un anochi ku tambe a forma parti di e anochi kultural di e siudat.

Klaro mi no por a tene e tepnan balioso akí pa mi so, ya ku un i tur; mayor, dosente i otro edukadó, eskritor òf persona ku gusta skirbi kreativo tur por saka algu ku ta sirbi nan for di e informashonnan akí. Pues aki ta sigui un resúmen di loke a bini dilanti durante di e anochi enrikesedó akí:

  • Tin biaha un eskitor por pasa dia ta “hasi nada i pèrdè tempu”, hasiendo mil i un kos, ménos e loke e mester hasi, esta skirbi. Ta konsiente ku e hasi nada aki tambe ta parti di e proseso, kaminda e ta kreando espasio den su mente, apsorvé loke e mester pa e siguiente buki ku e ta bai skirbi.
  • Pa esnan ku ta skirbi, eksperensiá algu ta yuda hopi mas ku djis skibi di teoria. Por ehèmpel si bo ke bai skirbi di subimentu di seru, bai eksperensi’é, kaba skirbi tokante di dje.
  • Ta konsiente ku hende no por skirbi riba preshon ni pa komplasé hende, pues maske kon bon eskritor e persona por ta, dun’é su espasio pa e por krea.
  • Ta importante pa e dosentenan realisá ku ora ta trata di skibimentu kreativo, e proseso ta mas importante ku e resultado. E ora ei skirbimentu ta bira algu atraktivo, prèt i interesante pa e mucha. Ta importante pa e dosentenan komprondé esaki, maske ku nan kuríkulo semper ta fihá riba e resultado final.
  • Komo dosente bo ta konsiente ku tempu ta kambia, pero tin kos ku teknologia no por remplasá i esaki ta: e base. Pues, duna e mucha e base i lag’é liber, i keda konfia ku algu bon lo sali afó.
  • Fayo tambe ta importante den e proseso di siñamentu.
  • Komentario negativo, prinsipalmente riba e area di arte, por kibra un mucha i pone ku nunka mas e ta bai hasi esaki. Kòrda ku arte ta mará na emoshon, pues ta importante pa ta kouteloso kiko i kon ta bisa un mucha algu.
  • Mester duna mucha libertat i espasio pa eksplorá. Laga nan wak kiko nan gusta i kiko no. Laga nan wak ken nan ta, promé ku bai pidi nan pa biba ken nan ke ta.
  • Stòp di sigui medionan sosial manera instagram, di wak kuantu premiashon e otro ta haña i abo no, bo tin chèns di kuminsá sinti bo un inútil. Si bo ta subi instagram, hasie pa sigui un tópiko/tema ku bo ta haña interesante.
  • Ted Talks sa duna bon konseho (wak ted.com òf busk’é riba youtube)
  • Buki di plachi, foto novela, kòmek, tur ta buki ku por usa pa stimulá lesamentu.
  • Lesa pa otro skucha, pa grandi i chikí, ta algu fasinante ku ta stimulá lesamentu.
  • Mester kòrda ku nos mes i nos muchanan a kuminsá lesa buki ku hopi plachi i tiki palabra, pues nos no tin purá pa bai na buki ku hopi teksto tiki pintura. Inkluso ta kos di evaluá si realmente esaki ta nesesario ora ta trata nivel di lesamentu.
  • Ora ta trata na stimulá mucha pa lesa, buki ku no ta di fikshon (buki informativo), por ta un entrada pa esaki. Pues skohe huntu ku e mucha e temanan ku e gusta i laga esaki ta un entrada pa e parti di fikshon. Por ehèmpel si e mucha ta gusta dinosouro, lesa kuné informashon tokante dinosouro. Kuminsá ku teksto kòrtiku, despues pasa pa buki ouditivo (si bo mes no ke lesa p’é) ku tin teksto un tiki mas largu, i asina sigui amplia te ora bo yega na e historia di dragon (fikshon).
  • Ilustrashon ta kambia kontenido di un buki por kompletu, e ta algu fuerte i mágiko ora ta trata skirbimentu. Ilustrashon di buki ta duna e buki henteramente un otro dimenshon.

Esaki, no ta tur kos, tin un ñapa mas. Lauren a klousurá e anochi bisando: “Being bored is good! No phone, no Ipad, get something to do! This stimulates creativity. We are too keen to please our children in comparison with the previous generation. Being boring is also a way to let our kids explore and get to know themselves. We must trust that our children will make it, and stop putting so much pressure on ourselves, afraid that our kids are happy or not, etc.”